Маҷмааи бузурги тандурустӣ дар пойтахт, ки санаи 4 март бо иштироки президенти Тоҷикистон Эмомалӣ Раҳмон мавриди баҳрабардорӣ қарор гирифт, аллакай «Истиқлол» номгузорӣ шуд. Лавҳаи пешинаи «Пойтахт-90»-и ин бино аллакай гирифта шудааст.

Ёдрас мекунем, ки дар маросими ифтитоҳи ин маркази тандурустӣ Эмомалӣ Раҳмон пешниҳод намуда буд, ки Маркази тандурустӣ ба номи Истиқлол гузошта шавад.

Имсол Тоҷикистон 25-умин солгарди истиқлолияти худро ҷашн мегирад ва аз эҳтимол дур нест, ки боз бисёре аз иншоот дар ҷумҳурӣ чунин номгузорӣ шаванд.

Мутобиқи маълумоти расмӣ, иншооти мазкур» дар майдони беш аз 10 гектар, дар байни Маркази ҷумҳуриявии ташхис ва бозори Султони Кабир ҷойгир шудааст. Марказ аз 38 иншоот, аз ҷумла бемористон бо 650 кат, дармонгоҳ барои қабули 800 беморон дар як баст ва ғайра иборат аст. Барои сохтмони марказ аз буҷети пойтахт зиёда аз 706 млн. сомонӣ маблағ ҷудо шудааст.

Дар марказ 620 номгӯи таҷҳизоти муосири ташхису табобатии истеҳсоли кишварҳои пешрафтаи ҷаҳон аз ширкатҳои бонуфузи Русия, Чин, Иёлоти Муттаҳидаи Амрико, Япония, Олмон, Финляндия ва Чехия дастрас ва насб шудааст, ки баъзеашон дар минтақаи Осиёи Марказӣ назир надоранд.

Бо ифтитоҳи Маҷмааи нави тандурустии Истиқлол 3500 ҷойи нави корӣ таъсис ёфта, ҳаҷми музди меҳнат дар он аз 1,2 ҳазор сомонӣ то 3,5 ҳазор сомониро ташкил хоҳад дод.