24 марти соли равон таҳти роҳбарии муовини вазири тандурустӣ ва ҳифзи иҷтимоии аҳолии Ҷумҳурии Тоҷикистон Мирҳамуддин Камолзода ҷаласаи навбатии ситоди вазорат оид ба пешгирии сирояти коронавирус ва ҷиҳати боз ҳам андешидани чораҳои қатъӣ ҷиҳати пешгирии интиқоли вируси мазкур ба мамлакат баргузор гардид.
Мирҳамуддин Камолзода, муовини вазири тандурустӣ ва ҳифзи иҷтимоии аҳолии Ҷумҳурии Тоҷикистон вобаста ба вазъи кунунии сирояти коронавирус дар тамоми ҷаҳон ибрози андеша намуда, аз ҷумла таъкид дошт, ки мутаассифона рӯз то рӯз хуруҷи сирояти мазкур дар тамоми ҷаҳон рӯ ба афзоиш аст: “Аз ин рӯ, вазъи сирояти мазкур дар ҷаҳон моро водор месозад, ки ҷиҳати пешгирии интиқоли вируси мазкур ба кишвар боз ҳам чораҳои қатъии пешгирикунандаро пурзӯр намоем”,-афзуд ӯ.
Ҳамзамон, иттилоъ дода шуд, ки аз 1 феврал то 24 марти соли равон 5179 нафар шаҳрвандоне, ки аз кишварҳои хориҷ ба Тоҷикистон ворид гардиданд, дар беморхонаҳои сироятӣ ва осоишгоҳҳои мамлакат ба карантин фаро гирифта шуданд.
Аз ин шумора то санаи зикргардида 2023 нафари онҳо ба хонаҳояшон рухсат дода шуда, айни ҳол 3156 нафарашон дар беморхонаҳои сироятии мамлакат ба карантин фаро гирифта шудаанд. Дар миёни шаҳрвандони ба карантин фаро гирифташуда 107 нафарашон шаҳрвандони хориҷӣ мебошанд.
Дар анҷоми ҷаласа ба роҳбарони муассисаҳои тандурустӣ ҷиҳати дар ҳолати омодабош қарор доштан ва захира намудани мавод ва молҳои тиббӣ барои пешгирии сирояти коронавирус, муҳайё намудани шароити мусоид ба нафарони дар карантин қарор дошта ва дигар масъалаҳои вобаста аз ҷониби муовини вазири тандурустӣ ва ҳифзи иҷтимоии аҳолии Ҷумҳурии Тоҷикистон Мирҳамуддин Камолзода дастуру супоришҳои мушаххас дода шуд.
Маврид ба зикр аст, ки айни замон бо мақсади пешгирии интиқоли сирояти коронавирус ба мамлакат дар сатҳи Ҳукумати ҷумҳурӣ ва вазорату идораҳои дахлдори кишвар ситоди корӣ ва байниидоравӣ фаъолият менамояд.
Аз ҷумла, ҳамрӯза дар Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ҷалсаи ситоди вазорат оид ба пешгирии сирояти коронавирус ду маротиба баргузор гардида, дар он масъалаҳои марбутаи сирояти коронавирус, аз ҷумла андешидани чораҳои пешгирикунандаи он мавриди баррасӣ қарор дода мешаванд.
Дар ин лаҳзаҳои ҳассос Вазорати тандурустӣ ва ҳифзи иҷтимоии аҳолии Ҷумҳурии Тоҷикистон аз тамоми сокинони мамлакат даъват ба амал меорад, ки ба ҳар гуна хабару овозаҳои бардурӯғ вобаста ба сирояти коронавирус, ки гӯё дар Тоҷикистон ба қайд гирифта шудааст, бовар нанамоянд.
Бояд гуфт, ки то имрӯз сирояти коронавирус дар Тоҷикистон ба қайд гирифта нашудааст, аммо чораҳои пешгирикунандаи он дар мамлакат рӯз то рӯз пурзӯр карда мешаванд.